सम्मान कइसे मिली।
मान नाहीं मिली
नारी जबले नारी के ही
सम्मान नाहीं देली।।
कोख में ज लइकी सुनिके
आँसू गिरे लागे
मनवा में कइसन कइसन
भाव जागे लागे
कोखी में बराबर जबले
अधिकार नहीं मिली
एक दिन खुशी मनवले
मान नाहीं मिली।।
जनमते ही लईकीन खातिर
दहेजवा सतावेला
यही देश में नारी ही खुद
नारी के जलावेला
जबले कुरीतिन के असली
अंजाम नाहीं मिली
एक दिन खुशी मनवले
मान नाहीं मिली।।
दुनिया में जिधरो देखा
अत्याचार बढ़त बा
नारी की शुचिता देखा
कइसे कइसे कुढ़त बा
नारी अपराधन के जबले
परिणाम नहीं मिली।
एक दिन खुशी मनवले
मान नाहीं मिली।।
माई, बहिन, बेटी, पत्नी अउर सहेली
कितना ही रूप नारी, हरपल धरेली
कइसन भी मुश्किल हो, उफ्फ ना करेली
चेहरा पे खुशी रखिके दुखवा छुपावेळी।
भगवान के देखली नाहीं,
तुहके ही देखली हम
बिना तोहरे चली नाहीं
सृष्टि ई एक्को कदम।
जवने घर में नारी के उचित
स्थान नाहीं मिली
वहि घर मा खुशियन के
फूल नाहीं खिली।
इहे बात अजय कहे
आज सबसे मिल के
सोच जबले बदली नाहीं
एहसास नाहीं खिली।
एक दिन खुशी मनवले
मान नाहीं मिली।।
✍️©️अजय कुमार पाण्डेय
हैदराबाद
09मार्च, 2021
